एसईईको प्रश्नपत्र सुरक्षार्थ खटिकै प्रहरीबाट आउट

सप्तरी । प्रदेश नं २ को एसईई परीक्षा प्रश्नपत्र आउट गर्ने ६ जनालाई प्रहरी केन्द्रीय अनुसन्धान ब्यूरो (सीआइबी) ले बिहीबार सार्वजनिक गरेको छ ।  प्रश्नपत्र आउट गर्ने कार्यमा संलग्न दुई प्रहरी, एक शिक्षकसहित ६ जनालाई प्रहरीले सार्वजनिक गरेको हो ।

सीआईबीले २ नम्बर प्रदेश प्रहरी कार्यालयमा बिहीबार संयुक्त पत्रकार सम्मेलन गरेर उनीहरूलाई सार्वजनिक गरेको हो । पक्राउ पर्नेमा इलाका प्रहरी कार्यालय कल्याण्डपुरमा कार्यरत प्रहरी जवान सप्तरीको राजविराज–१० का ब्रम्हदेव सुनरैत र कञ्चनरुप–६ का दिपेन्द्रकुमार मण्डल छन् । यस्तै, पक्राउ पर्ने अन्यमा विष्णुदेव यादव, शिक्षक मनोज यादव, राजेश यादव र उमेश यादव छन् ।

प्रदेश नम्बर २ मा चैत १४ गतेको विज्ञान र १५ गतेको सामाजिक विषयको प्रश्नपत्र परीक्षा सुरु हुनुअगावै उनीहरुले विभिन्न सामाजिक सञ्जालमार्फत आउट गरेका थिए । प्रश्नपत्र आउट भएसँगै प्रदेश २ को एसईईका सम्पूर्ण परीक्षा रद्द गरिएको थियो । सो प्रकरणको अनुसन्धानमा जुटेको ब्युरोले प्रहरीसमेतलाई पक्राउ गरी सार्वजनिक गरेको हो ।

इप्रका, कल्याणपुरमा जनता मावि बनिया र रादु मावि कल्याणपुरको प्रश्नपत्र राखिएको थियो । जसको सुरक्षार्थ खटिएका जवान नै प्रश्नपत्र लिक गराउने कार्यमा संलग्न रहेको भेटिएका हुन् ।

प्रकाशित २१ चैत्र २0७५ , बिहिबार | 2019-04-04 12:03:39

प्रतिकृया दिनुहोस